जीवड़ौ कळपावै क्यूं

चंदौ खुद सरमावै थां सूं, मुखड़ौ थूं मुरझावै क्यूं ।

ए भीम बजर छाती रा माणस, जीवड़ौ कळपावै क्यूं ॥

मावस री काळी रातां मांय, थन्नै पुनम रौ भान है कोनी ।

थूं सरवर रौ तैराकी, किनारौ अळ्गौ कोनीं ॥

बायरौ तप हर लेसी, इतरौ थूं घबरावै क्यूं ।

ए भीम बजर छाती रा माणस, जीवड़ौ कळपावै क्यूं ॥

थूं पाणी रौ रेलौ है, तोड़ भाखर बह्तौ जा ।

थूं रैण वैर तेज दिवलौ, पवन-पावस सह्तौ जा ॥

थारा पगां मांय माथा नमसी, हिम्मत राख थूं हारै क्यूं ।

ए भीम बजर छाती रा माणस, जीवड़ौ कळपावै क्यूं ॥

थूं रण बांकुरा कठौ रह्जै, सिंझ्या तांई लडणौ पड़सी ।

सुण पंखेरू चुग्गौ लाय'र, सिंझ्या तांई उडनौ पड़सी ॥

सोरो-दोरो जीवणौ पड़सी, आंसूड़ा ढळकावै क्यूं ।

ए भीम बजर छाती रा माणस, जीवड़ौ कळपावै क्यूं ॥

कुण नीं कड़वा घुंट भरया, संसारी दुख रा दरिया मांय ।

कुण पंथी ठोकर नीं खाई, सुळ नीं चुभ्यौ किण हिया मांय ॥

कुण नीं रैण ओझके काढ़ी, कंचन काया बाळै क्यूं ।

ए भीम बजर छाती रा माणस, जीवड़ौ कळपावै क्यूं ॥